In reaksie op die jongste data van die oesskattingskomitee wat deur Agbiz bekend gemaak is, het Taylor die werkywer en deursettingsvermoë van Suid-Afrikaanse boere geloof vir die bemoedigende skattings van nasionale oeste te midde van verskeie struikelblokke, waaronder weerbekommernisse, stygende insetkoste, arbeidsonrus en beurtkrag.
Ten spyte van ’n moeilike planttyd oor ’n groot deel van Suid-Afrika weens die wisselvallige weerstoestande aan die begin van die 2022-’23-somerproduksieseisoen, bied die nuwe data goeie hoop dat Suid-Afrika voldoende stapelvoedselvoorrade in die 2023-’24-bemarkingsjaar sal hê, wat ooreenstem met die 2022-’23-produksieseisoen.
Aanhoudende beurtkrag het kommer laat ontstaan dat gebiede onder besproeiing swak opbrengste kan lewer. Gelukkig het die gunstige reënval, teen ’n matige pas, vanaf middel Februarie ’n broodnodige blaaskans en verbeterde oestoestande gebied. Binne die somergraan- en oliesade-afdelings word ongeveer 20% van mielies en 15% van sojabone onder besproeiing geproduseer.
Kortom, die oesskattingskomitee se data plaas die verwagte opbrengste van stapelgraansoorte en -oliesade effens hoër as die vorige seisoen. Die verwagte verbetering in die mielie-oes volg op beter opbrengste, aangesien die oppervlakte-aanplantings marginaal laer is as die 2021-’22-seisoen. Intussen is die sterk voorspelde toename in sojabone die gevolg van verwagte groot opbrengste en ’n uitbreiding in aanplantings.
Die daling in die voorspelling vir sonneblomsaadproduksie is die gevolg van die verminderde aanplantings en opbrengste in sommige gebiede. Ander gewasse, soos sorghum en grondbone, het ook ’n redelik groot verwagte oes as alles goed gaan.
CNH Industrial wens alle somergraanprodusente ’n goeie oes toe. As ’n toonaangewende verskaffer van landboutoerusting, met sy handelsmerke Case IH en New Holland, wat trekkers, stropers, planters, spuite en balers insluit, is CNH Agriculture ’n jare lange vennoot van boere in die streek. Die maatskappy maak ook gebruik van meer as 175 jaar se erfenis en ervaring van die landboubedryf reg oor die wêreld.
Hoewel sekere subsektore steeds onder druk is, bly die vooruitsigte vir die plaaslike landbou as geheel gunstig. Met die ervaring van sy noue samewerking met boere kan die maatskappy nie die belangrikheid van hul harde werk en onwrikbare toewyding oorbeklemtoon nie. Te midde van ernstige kwessies doen boere alles in hul vermoë om voedselsekerheid vir Suid-Afrika te verseker.
Dit is geen geheim dat ’n robuuste landbousektor, insluitend alle kleinboere, kommersiële boere en verwante ondernemings, nie net ’n onvervangbare steunpilaar van die ekonomie is nie, maar ook noodsaaklik is vir voedselsekerheid, werkskepping en die welstand van talle gemeenskappe in landelike gebiede. Om hierdie belangrike redes doen CNH Industrial ’n beroep op almal in Suid-Afrika om aan te hou om boere te ondersteun.
