SA Vleismerino-ramme het laas jaar rekordpryse op veilings behaal en daar is ’n baie goeie rede daarvoor.
“Die stoetbedryf is verantwoordelik om goeie teelmateriaal aan die kommersiële bedryf te verskaf en daarom is dit nodig om gereeld te kyk of jy nog voldoen aan dit wat vereis word, en of dit wat jy aan die bedryf verskaf, presteer,” verduidelik mnr. Manie Lombard, voorsitter van die SA Vleismerino-telersgenootskap (SAVM). “Daarom het ons in 2017 ’n paar belangrike besluite geneem. Die eerste een was om by die bewese tipe dier – dit wat hom so gewild maak in Suid-Afrika – te bly. Dit beteken ’n mediumraam-tipe met ’n sterk konstitusie, wat homself kan handhaaf.”
’n Sterk konstitusie verwys na die skaap se goeie bespiering, herstelvermoë en loopvermoë. Dié ras is ook goed aangepas op ekstensiewe en intensiewe omstandighede.
“Tweedens het ons met die samewerking van SA Stamboek teelwaardes geformuleer wat ’n klem plaas op ekonomiese belangrike eienskappe,” sê Lombard.
Goeie pryse
Die SAVM-telersgenootskap het ook ander inisiatiewe van stapel gestuur. Hulle het byvoorbeeld begin om so ver moontlik jong ramme by veilings te verskaf wat vrugbaar, fiks en maklik aanpasbaar is.
“Om terug te keer na die bewese tipe SA Vleismerino het meegebring dat daar die afgelope drie jaar minder, maar werklik goeie gehalte ramme deurgaans op veilings aangebied is. Dit het ook bygedra tot die goeie pryse wat ramme op veilings behaal,” sê mnr. Jan Vosloo, bestuurder van die SAVM-telersgenootskap.
“Die regte en betroubare mediumraam-tipe ramme en hoogs produktiewe ooie sal in Suid-Afrika altyd die toets van die tyd kan deurstaan.”
Kruisteling en wol
Die SAVM is ’n ware dubbeldoelras wat nie net gewild is as vleisskaap nie, dié ras word gereeld deur wolboere in kruisteling ingespan. Dit is die SAVM se steekhaarvrye wit wol wat hierin sy geheime wapen is.
“Ons is trots op die wol. Dis van goeie gehalte en dit word gehandhaaf deur seleksie en keuring. Omdat dit wit wol is met ’n veseldikte rondom 22 mikron, beveel ons die ras met vrymoedigheid aan vir kruisteling,” sê Lombard.
Die voordeel wat die SA Vleismerino het, is dat hy kan toevoeg tot lamsvleisproduksie van enige wolras, sonder om die gehalte van die skeersel te benadeel, juis omdat dit steekhaarvry is.
Skoue en veilings
Die SAVM se ramskoue is ook gewild en sy nasionale skou word elke jaar in Bloemfontein gehou. In 2022 was daar sowat 450 raminskrywings en vanjaar 461 inskrywings.
“Dit is altyd ’n mooi skouspel en daar is sterk kompetisie,” sê Lombard. “Ons gebruik gewigsklasse en ’n boonste gewigsgrens. Dan is daar ook streekskoue wat die klubs aanbied, wat ’n goeie geleentheid is vir jong en beginnertelers om mekaar te leer ken.”
Vanjaar se nasionale kampioenskapskou vir ramme word op 14 en 15 Maart by die Bloemskou-terrein gehou.
In Augustus is daar vier nasionale veilings waarvoor enige SAVM-teler kan inskryf. Dit vind plaas op:
· Die eerste Woensdag, 2 Augustus 2023, by Bloemskou se terrein.
· Die Dinsdag daarna, 8 Augustus 2023, by die VKB-veilingsentrum naby Frankfort.
· Die derde Woensdag, 16 Augustus 2023, by Wolmaransstad se Boeresaal.
· Die laaste Dinsdag, 29 Augustus 2023, by die Hoëveld-veilingsentrum buite Standerton.
