Gebiede kan binne weke of selfs dae in droogte gedompel word om sodoende belowende oeste te vernietig.
Só sê navorsers in Amerika en Hongkong luidens bevindinge wat in Nature Communications gepubliseer is. In die afgelope twee dekades was daar wêreldwyd 3-19% meer blitsdroogtes wat binne slegs vyf dae ontstaan het.
Dit kom tot 59% meer voor in gebiede soos Suid-Asië, Suidoos-Asië en Sentraal-Noord-Amerika. Luidens ’n verklaring sê prof. Zong-Liang Yang van die Universiteit van Texas, Austin, dit is waarskynlik weens stygende temperature wêreldwyd. “Daar is elke jaar rekordwarm tydperke, wat dikwels die voorlopers van sulke droogtes is.”
