Mense wat langs die Doringrivier bly, is vanoggend aangesê om hul plase te ontruim omdat daar baie water op pad is, luidens die Facebookblad Visit Sutherland.
Mense en diere moet eers na veiligheid gebring word, en meer nuus is dus nog skaars. Landbou.com kon darem ’n kort boodskap van mnr. André Vermeulen kry. Vermeulen is die eienaar van die Sadawa wildreservaat en boer met skaap ook.
“Dis maar redelik chaos, ons hardloop rond om te kyk of ons mense uit die nood kan help. Ons het gisteraand al mense met hul karre uit die rivier getrek. Daar is maar redelik skade. Ons is al oor die 50 jaar op die stuk grond, maar die riviere het nog nooit so geloop nie.
“Die riviere is nog besig om op te kom en daar word nog reën voorspel. Ons dink die groot water is nog op pad.”
Mnr. Leon Theunissen van die plaas Kareekolk op die Sutherlandpad sê die vloed is baie ernstig. “Die riviere kom al oor die paaie. Die Doringrivier is in vloed. Daar is al ’n Discovery-voertuig af. Die Grootrivier loop ook oor sy walle.”
Theunissen sê hy het die naweek 95 mm reën op Kareekolk gehad en 130 mm op die plaas wat op die Calviniapad voor die berg is.
Die gebied se infrastruktuur is erg beskadig, sê hy. “Baie plaasdamme se walle het gebreek en daar is mense wie se huise heeltemal tot op die grond vernietig is.”
Volgens hom is baie mense vasgekeer, en ongelukkig waag mense steeds kanse om deur die riviere te probeer ry. Boonop word ’n verdere 37 mm reën voorspel.
Paaie verspoel, drade weggespoel
Me. Carole Pretorius van die plaas Avontuur, wat langs die R355-pad, 22 km van die Touwsrivierafdraai geleë is, sê dit het die afgelope naweek 136 mm daar gereën.
“My plaas is aan die begin van die Tankwa en ek het baie skade gehad. Die paaie het verspoel en die drade het weggespoel. Die Bloedrivier wat oor die plaas loop, kom sommer groot af.”
Sy het vanoggend gesê sy is nog veilig, maar dat sy alleen op die plaas is en baie skadebeheer moet doen.
Mnr. Marco Combrinck van Gordonsbaai se skoonouers, mnr. Roelf en me. Roenel Haasbroek van die plaas Da Doer op pad na die Tankwa-Karoo Nasionale Park, se huis se dak is afgeruk. Hul nuwe padstal wat in 2023 sou open, se dak is ook afgeruk.
“Sover ek kan aflei, is hulle veilig en niemand is beseer nie. Dis moeilik om by hulle uit te kom, maar ek gaan môre probeer.”
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
