Voorspellings vir die winter is nog onseker met die La Niña-stelsel wat stadiger verswak as wat vroeër verwag is. Weermodelle dui tans aan dat die kans op gemiddelde reënval in die komende winter 50% is.
Mnr. Johan van den Berg, onafhanklike landbouweerkundige, sê die huidige La Niña-stelsel wat die laaste in ’n reeks van drie agtereenvolgende La Niña-episodes was, is nou ongeveer in ’n neutrale periode vanaf middel Februarie. “Die Suidelike Ossilasie-indeks (SOI), wat die reaksie van die klimaat op die onderliggende see-oppervlaktemperature verteenwoordig, reageer egter baie stadig en was teen einde Februarie steeds La Niña-neigend. Dit beteken dat die oorhoofse klimaatstelsels steeds redelik La Niña neigend is, wat voorspellings baie onseker maak.
“Van April af behoort see-oppervlaktemperature en ander indekse soos die SOI neutraal te wees tot in die laatwinter. Vanaf Augustus behoort dit oor te gaan na El Niño-toestande met ’n groot waarskynlikheid dat El Niño teenwoordig kan wees vanaf September vir die hele 2023-’24-somerseisoen.”
