Redelik goeie reënneerslae word gedurende die tweede deel van September in die kusgebiede en aangrensende binneland van KwaZulu-Natal voorspel, met die kans op reën wat verder verbeter in Oktober. Baie stormagtige weerstoestande kan begin voorkom oor KwaZulu-Natal in die laaste deel van September, maar veral in Oktober, sê mnr. Johan van den Berg, onafhanklike landbouweerkundige.
“Die huidige voorspelling vir die komende seisoen is steeds baie gunstig vir gemiddelde tot bogemiddelde reënval vir die grootste deel van die somerreëngebied van Suid-Afrika, asook Namibië en Botswana.”
Van den Berg sê gedurende Oktober gaan reën na verwagting oor die oostelike binneland begin voorkom. As voorbeeld word sowat 30 mm of meer reën in die laaste week van September en die eerste week van Oktober by Ermelo op die oostelike Hoëveld voorspel. Redelik goeie neerslae is ook moontlik in die suidelike Laeveld rondom Mbombela vanaf die laaste deel van September.
