Weermodelle dui aan dat see-oppervlaktemperature van al die Niño-gebiede, met die uitsondering van die Niño-4 (naaste aan Australië), 0,5°C of meer warmer as normaal is. Die gebied teen Suid-Amerika is reeds 2,4°C warmer as normaal (dis die Niño1+2-gebied).
“Die huidige ontwikkeling is baie vroeër as normaal en daar is onsekerheid wat dit kan beteken. Dit kan eerstens beteken dat die draaipunt (van die stelsel) vroeër bereik kan word of tweedens dat dit ’n baie sterk en langduriger El Niño-stelsel kan wees,” sê Johan van den Berg, onafhanklike landbouweerkundige.
Die indekswaarde van die Suidelike Ossilasie Indeks (SOI) het vir die eerste keer vir ’n taamlike lang tydperk (sedert ongeveer die helfte van April) onder zero inbeweeg en is op ’n skaal van -30 (’n sterk El Niño-stelsel) tot +30 (’n sterk La Niña-stelsel) tans op -8.36. “Indien hierdie neiging voortduur, behoort dit teen middel Junie reeds sterk El Niño-neigend te wees. Die implikasie hiervan is ’n gemiddelde tot bo-gemiddelde kans op reën in die lente oor veral die sentrale, suidelike en westelike dele.”
