Die El Niño Suidelike Ossilasie beskryf die stand van see-oppervlaktemperature en die oorhoofse koppeling van klimaatspatrone in die sentrale Stille Oseaan. Dit bestaan uit die twee pole, El Niño en La Niña, met ’n neutrale stand wat soms tydens seisoene kan voorkom.
Mnr. Johan van den Berg, onafhanklike landbouweerkundige, sê die derde La Niña-verskynsel in ’n ry het teen einde Februarie 2023 tot ’n einde gekom. Geassosieerde indekse soos die Suidelike Ossilasie-indeks (SOI) het ook nou vir die eerste keer in ’n lang tyd uit die La Niña-reeks begin skuif.
“Die oorgangsfase maak dat langertermynvoorspellings baie onseker is, want daar kan steeds karaktertrekke van La Niña oorbly wat ’n invloed op reënval kan uitoefen. Daar is baie sterk aanduidings dat ’n El Niño-verskynsel gaan ontwikkel vanaf die einde van die winter om gevestig te wees teen September en/of Oktober. Dit beteken dat die somerseisoen vanaf Oktober 2023 tot Maart en/of April 2024 El Niño-neigend behoort te wees.”
