Die stelling word dikwels gemaak dat ’n baie sterk ooreenkoms bestaan ten opsigte van klimaatpatrone, en veral uiterste reënvalpatrone, tussen Suider-Afrika en Australië. “Dit is waar in die meeste gevalle, maar dit is belangrik om te bepaal waar die uitermatige weerpatrone voorkom in Australië en of dit werklik deel is van grootskaalse patrone,” sê mnr. Johan van den Berg, onafhanklike landbouweerkundige. Vloede kom tans in die meer noordelike en noordwestelike dele van Australië voor. Die sikloon Ellie het van die ergste vloede in die afgelope eeu in die noordwestelike dele veroorsaak.
Gewoonlik is die reënvalpatrone van die ooskus en suidoostelike dele van Australië meer gekorreleer met reënvalpatrone oor Suider-Afrika. “Dus is die huidige vloede en die gebied waar dit voorkom in Australië nie noodwendig ’n teken van vloede wat kan volg in Suider-Afrika nie,” sê Van den Berg.
Gedurende ’n soortgelyke weerjaar as vanjaar, in 2012, het erge vloede teen einde Januarie oor die suidooste van Australië voorgekom, maar dit het nie oor Suider-Afrika voorgekom nie. Gewoonlik is die reën in die laatwinter en lente in die suidoostelike dele van Australië ’n teken van swaar reën in Suid-Afrika gedurende die midsomer (soos in die winter en lente van 2022 in Australië en eerste deel van die somer in Suid-Afrika).
