Die Suid-Afrikaanse Weerdiens sê luidens ’n verklaring dat Freddy binnekort die Mosambiekse kus tussen die dorpe Vilankulos en Maxixe sal bereik. Die windspoed rondom die sikloon se draaikolk is van 89 km/h en 118 km/h en kan skadelik wees vir die omgewing langs die kus en die aangrensende binneland.
Hoewel Freddy as ’n ernstige tropiese storm op die Mosambiekse kus sal aankom, sal dié stelsel egter volgens die weerdiens na verwagting gedurende die naweek begin verswak.
Intussen word inwoners van die suidelike dele van Mosambiek versoek om bewus te wees van waarskynlike tropiese stortreënbuie en winderige omstandighede gedurende die naweek. Mosambiekse riviere sal ook binnekort in vloed wees, wat die situasie verder kan vererger.
Die weerdiens sê die goeie nuus is dat Freddy waarskynlik slegs baie gelokaliseerde vloede sal veroorsaak en ’n geringe impak op Suid-Afrika in die komende dae sal hê.
Die enigste deel van die land wat ’n direkte impak kan verwag weens swaar reën en moontlike vloede, is Vhembe en Mopani in die verre ooste van Limpopo. As gevolg daarvan het die weerdiens ’n oranje vlak 5-waarskuwing uitgereik vir dié gebied uitgereik.
Tesame met hierdie waarskuwing is ’n geel vlak 2-waarskuwing uitgereik vir die res van die Laeveld in Limpopo en Mpumalanga, asook die platorand in Limpopo.
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
