Die Suid-Afrikaanse Weerdiens sê dit sal vandag bewolk en koel in die weste van die Wes-Kaap wees met reënbuie wat vanaf vanoggend tot vanmiddag verwag word. ’n Uiters hoë brandgevaar is egter vir Beaufort-Wes, Laingsburg, Prins Albert en Kannaland uitgereik.
Die weerdiens waarsku ook oor ’n uiters hoë brandgevaar in die munisipaliteit Dr. Beyers Naudé in die Oos-Kaap, die distrikmunisipaliteit John Taolo Gaetsewe in die Noord-Kaap en die westelike dele van die Noordwes.
’n Geel vlak 1-waarskuwing vir ernstige donderstorms wat plek-plek tot vloede en skade aan eiendom kan lei, is uitgereik vir die distrikmunisipaliteite Amathole, OR Tambo en Alfred Nzo, asook die munisipaliteite Enoch Mgijima, Intsika Yethu en Engcobo in die Oos-Kaap.
Die weerdiens het ’n geel vlak 2-waarskuwing uitgereik vir moontlike skadelike wind tussen Tafelbaai en Kaap Agulhas, asook die Sentraal-Karoo en Breedevallei in die Wes-Kaap, en die munisipaliteit Karoo Hoogland in die Noord-Kaap.
In die noorde van Gauteng word mooi en warm weer verwag wat vanmiddag gedeeltelik bewolk sal word. In Mpumalanga sal dit gedeeltelik bewolk en warm wees, maar baie warm in die Laeveld. Gedeeltelik bewolkte en warm tot baie warm weer word in Limpopo, Noordwes en die Vrystaat verwag.
Die weerdiens voorspel gedeeltelik bewolkte en koel tot warm weer vir die Noord-Kaap met enkele donderbuie in die ooste van die provinsie. Gedeeltelik bewolkte en warm weer met enkele tot verspreide bui en donderbuie word vir die Oos-Kaap voorspel.
In KwaZulu-Natal sal dit gedeeltelik bewolk en warm wees met enkele buie en donderbuie in die suide van die provinsie.
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
