Die eerste intense koue front het vroeg vanoggend sy opwagting in die Wes-Kaap gemaak. Die stelsel kan vanmiddag na die Oos-Kaap en teen vanaand na KwaZulu-Natal versprei.
Volgens die SAWD word baie koue, reënerige omstandighede en sneeu op die oostelike hooggeleë gebiede van die Wes-Kaap vandag verwag. Dit sal teen vanmiddag na die hooggeleë gebiede van die Oos-Kaap versprei en tot Vrydag voortduur. Dit kan paaie en bergpasse onbegaanbaar maak.
Sneeu sal volgens die SAWD vanaf vanaand op die Drakensberg in KwaZulu-Natal val.
Hoewel temperature teen môre in die Wes-Kaap sal begin styg, sal koue omstandighede in gedeeltes van Mpumalanga en die suidelike dele van Gauteng voortduur.
Na verwagting sal 15 mm tot 35 mm reën oor die suidelike gedeeltes van die Wes-Kaap en die suidwestelike gedeeltes van die Oos-Kaap val. Reënval van 40 mm tot 50 mm word langs die kus- en bergagtige gebiede van die oostelike deel van die Tuinroete, die Suidkus en die aangrensende binneland van die Oos-Kaap verwag. Die SAWD waarsku dat dit plek-plek oorstromings kan veroorsaak.
’n Tweede laagdrukstel sal teen môre oor die westelike binneland ontwikkel, wat sal veroorsaak dat winderige omstandighede oor die suidelike gedeeltes van Suid-Afrika voortduur. Die stelsel sal ook reënval oor die binneland veroorsaak, wat ongewoon vir hierdie tyd van die jaar is.
Vanweë die laagdrukstelsel sal reënbuie en donderstorms ontwikkel wat die oostelike gedeeltes van die Noord-Kaap, die Vrystaat asook die noordelike en oostelike gedeeltes van die Oos-Kaap sal raak.
Reënval van 30 mm tot 44 mm word oor die verre oostelike gedeeltes van die Noord-Kaap, die suidwestelike gedeeltes van die Vrystaat en die verre noordelike binneland van die Oos-Kaap, waar baie koue omstandighede sal voortduur, verwag.
Die SAWD waarsku dat van die donderstorms sterk kan wees en groot hoeveelhede klein haelkorrels kan veroorsaak.
Sneeuval sal waarskynlik voorkom oor die noordelike hooggeleë gedeeltes van die Oos-Kaap, die Drakensberge en die verre oostelike gedeeltes van die Vrystaat, terwyl ligte sneeu oor die Suid-Vrystaat en suidoostelike gedeeltes van die Noord-Kaap verwag word.
Die SAWD maan veeboere om te verseker dat hul vee vroegtydig, voor die winterweer sy aankoms maak, na veilige skuiling geskuif word om vrektes te voorkom.
Die laagdrukstelsel sal na verwagting tot Sondag die weer beïnvloed.
