Die La Niña-stelsel wat sedert Oktober tot swaar neerslae bygedra het, is die derde agtereenvolgende La Niña-stelsel sedert die 2020-’21-somerseisoen. “Dit is maar die derde keer in ongeveer die laaste eeu dat dit gebeur,” sê mnr. Johan van den Berg, onafhanklike landbouweerkundige. “Hoewel die reeks agtereenvolgende La Niña-verskynsels as ’n eenheid gesien kan word, verswak dit altyd tydens die winter in die Suidelike Halfrond. Daarom word dit gesien as aparte gebeure wat deel vorm van ’n groter geheel.”
Die huidige La Niña-stelsel is waarskynlik die laaste in hierdie reeks, want die kans op ’n vierde agtereenvolgende La Niña is omtrent zero. Dit kom voor dat dit gouer begin verswak as enkeljarige La Niña-verskynsels.
“Die huidige La Niña-stelsel het gouer ’n spits bereik as die meeste ander vorige La Niña-verskynsels, want dit het reeds in November begin verswak terwyl dit gewoonlik ’n draaipunt in Desember of Januarie bereik. Die verswakkende fase het dikwels ’n ongunstige uitwerking op reënvaltoestande met ’n vertragingsperiode van een tot twee maande,” sê Van den Berg.
