Die Suid-Afrikaanse Weerdiens het ’n geel vlak 2-waarskuwing uitgereik vir ontwrigtende reën wat plek-plek tot die verspoeling van paaie en nedersettings in Kaapstad, die Overberg en die suidelike gedeeltes van die Kaapse Wynland kan lei.
Nog ’n geel vlak 2-waarskuwing is uitgereik vir ontwrigtende reën in die sentrale en noordelike gedeeltes van die Wes-Kaap, asook die suidelike Namakwaland in die Noord-Kaap. Die weerdiens waarsku dat wind van minstens 60 km/h en rukwind van 85 km/h in die noordwestelike en noordsentrale gedeeltes van die Oos-Kaap verwag word.
’n Uiters hoë brandgevaar word verwag oor die ooste van die Noord-Kaap, die weste en suidweste van die Vrystaat, die suidweste van Noordwes, die Sentraal-Karoo in die Wes-Kaap en die westelike helfte van die Oos-Kaap.
In Gauteng, Mpumalanga, Limpopo, Noordwes en die Vrystaat sal dit gedeeltelik bewolk en warm wees met enkele tot verspreide buie en donderbuie.
Die weerdiens voorspel mooi en warm tot baie warm weer vir die Noord-Kaap, buiten vir die noordoostelike gedeelte van die provinsie waar dit gedeeltelik bewolk sal wees met enkele buie en donderbuie gedurende die middag.
In die Wes-Kaap sal dit bewolk tot gedeeltelik bewolk en koel tot warm wees met enkele tot verspreide buie gedurende die middag. Buie sal wydverspreid in die verre suidweste van die provinsie wees.
Mooi tot gedeeltelik bewolkte en warm tot baie warm weer word vir die Oos-Kaap voorspel. Enkele buie kan vanmiddag voorkom.
In KwaZulu-Natal sal dit gedeeltelik bewolk en warm tot baie warm wees met enkele buie en donderbuie. In die ooste van die provinsie sal dit baie warm tot uiters warm wees.
* Hoe lyk die weer in jou provinsie vandag? Stuur jou weerfoto’s na nuus@landbou.com.
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
