“Vanoggend se hael was ’n vreemde verskynsel, iets wat ek nog nooit in my 11 jaar op die plaas gesien het nie,” sê mnr. Jaco Smit wat op Witkei, ’n entjie van Rustasie af, met beeste boer. “Inteendeel, ek het in my lewe nog nooit in die Swartland sulke groot haelkorrels gesien nie.”
Vanoggend se korrels was net-net kleiner as ’n gholfbal en het tot sy honde se kosbakke en sy ganse se eiers stukkend geslaan.
“Ons kry gewoonlik spookasemhael wat baie klein is, maar hierdie korrels van vandag is vir ons vreemd. Dit het amper geklink of ons huis met klippe bestook word toe die eerste korrels val.”
Hy was op sy rekenaar besig toe die haelkorrels op die sinkdakke en plaashuis se dak begin val. “Ek was eers verdwaas toe ek dit hoor en het gewag vir die vensters om te breek, maar gelukkig is ons dít gespaar.”
Smit het wel een korrel teen die kop gekry nadat hy uitgegaan het om sy bakkie in die skuur te trek toe dit begin hael. “Ek het maar eerder vinnig omgedraai kort nadat een korrel my teen die kop getref het.”
Nadat die hael opgehou het, het dit ongeveer ’n uur gereën. Hy het 22 mm gemeet. “Nou skyn die son,” het hy kort voor 14:00 aan Landbouweekblad gesê.
Gelukkig is sy beeste nie ernstig beseer nie, hoewel van hulle knoppe het waar die korrels hul getref het.
“Ongelukkig is daar heelwat dooie voëls ná die haelbui. Die bome se blare en takke het ook erg deurgeloop.”
Koringboere het juis nou in die Swartland begin stroop en hoewel die reën en moontlike haelskade die graad van die koring kan beïnvloed, is dit nog te vroeg om vas te stel.
Landbouweekblad het met ’n paar koringboere in die omgewing gesels, maar nie een van hul koringlande het onder die groot haelkorrels deurgeloop nie.
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
