Mnr. Breyten Booysen van die Witzenberg-reddingsdienste het die video aan Landbouweekblad gestuur. Volgens hom is die paaie in die Tankwa moeilik begaanbaar en mense wat daar wil ry, word aangeraai om met vierwielaangedrewe voertuie in groepe saam te ry.
“Ons sukkel om tussen plase te ry, hier is baie water.” Hy sê mense kan die reddingsdienste kontak op 023 316 2329 vir hulp en bystand.
“Ons gaan later vandag weer terug Tankwa toe om te help.”
Boere in die omgewing is reeds gister aangeraai om op hul hoede te wees. Op verskeie Facebook-groepe is video’s en foto’s geplaas van strome water wat in paaie en oor brûe in die Tankwa spoel.
Reën kom betyds vir rooibos
Die reën van die afgelope paar dae oor dele van die Wes- en Noord-Kaap was betyds om die jong rooibosplantasies en die saad en plantjies wat vanjaar geplant is, langer te laat groei voordat oestyd oor ’n paar weke begin.
Rooibosplantasies
het in November en Desember begin swaar trek ná ’n baie droë winter, maar die
14 mm tot 68 mm reën wat van Saterdag af op verskillende plekke geval het, gaan
baie help.
Mnr. Johan Brand, tegniese bestuurder by Rooibos Bpk., sê hulle het verlede jaar min of meer die ooreenstemmende tyd 40 mm reën gehad wat toe ’n groot verskil aan vanjaar se oes gemaak het.
Brand sê die reën gaan dalk nie ’n groot verskil aan die ou bosse maak nie. “Hulle het klaar die boodskap gestuur dat hulle nie verder gaan groei nie, maar dis goud werd vir die tee wat vanjaar geplant is.”
Die reën kan die rooibosoesskatting vir 2023 met 2 000 ton tot 19 000 ton verhoog. Dis steeds laer as die 22 000 ton-oes van vanjaar en die 25 000 ton-oes wat in 2021 behaal is.
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
