Kol-kol en wisselvallig, is hoe boere die neerslae wat oornag in KwaZulu-Natal geval het, beskryf. In die suide van die provinsie het neerslae van rondom 20 mm plaasgevind, en in die noorde stortvloede.
Mnr. Herman de Wet, voorsitter van TLU SA in KwaZulu-Natal en veeboer in die distrik Rorke’s Drift, het sy verbasing uitgespreek oor die wisselvalligheid van reënval in sy streek. Saaiboere in die distrik Normandien in die noorde van die provinsie het byvoorbeeld gesukkel om hul 2022-’23-gewasse in oornat toestande te plant.
“Hoewel dié boere daarin geslaag het om klaar te plant, dink ek die volgende probleem kan wees wanneer hulle binnekort stikstofkunsmis op hierdie gewasse in steeds nat, en moontlik selfs natter, lande moet toedien. Almal hoop dat die weer hulle kans gee sodat hulle in die saailande kan kom.”
