Die La Niña-stelsel het sowat ’n maand vroeër as wat weermodelle aanvanklik aangedui het die spits bereik. “Die stelsel het reeds in November ’n spits bereik nadat voorspellings aanvanklik ’n draaipunt in Desember getoon het. Dit is tans in ’n vinnig dalende fase,” sê mnr. Johan van den Berg, onafhanklike landbouweerkundige.
Die stelsel is wel wisselvallig en kan weer versterk, maar dit is onwaarskynlik. Van den Berg sê die weermodelle dui aan dat die daling tydens Desember kan voortduur. Hierdie dalende neiging kan nadelige gevolge hê vir reënval vir veral die westelike dele van die somerreënstreek wat gewoonlik tydens die tweede deel van die somer die beste neerslae ontvang.
Die gebiede wat eerste geraak kan word, kan die Noord-Kaap, groot dele van die Oos-Kaap, dele van die Wes-Vrystaat en die westelike dele van Noordwes insluit. Van den Berg sê dié dele kan reeds in Desember nadelig beïnvloed word.
