Reën word vandeesweek nie net oor die somerreëngebiede verwag nie, maar die Wes- en Suid-Kaap kan kort voor en ná Kersfees ook reën kry.
Reën word tot Kersfees oor die oostelike en sentrale dele van Suid-Afrika verwag, terwyl enkele buie Dinsdag en Woensdag oor die westelike dele van die somerreënstreek voorspel word.
Die Suid-Afrikaanse weerdiens waarsku ook op Twitter dat storms met swaar reën en hael oor die sentrale en noordelike dele van die Noord-Kaap vandag en môre kan voorkom.
Yellow level 2 warning: Thunderstorms: Northern Cape: 20 and 21 December 2021 pic.twitter.com/7qyV38jkkf
— SA Weather Service (@SAWeatherServic) December 20, 2021
Mnr. Johan van den Berg, onafhanklike landbouweerkundige, sê op kort termyn lyk dit asof ’n tydelike draaipunt ontwikkel oor die somerreëngebiede met minder reën en droër toestande ná Kersfees. Veral die sentrale tot westelike dele behoort in die eerste deel van Januarie droër en warmer te wees.
Neerslae van 30 mm tot 50 mm is moontlik oor byvoorbeeld die distrik Bethal in Mpumalanga tot einde Desember, terwyl goeie neerslae moontlik is oor die res van die oostelike en sentrale dele.
Hy sê dit is moeilik om droër tydperke gedurende La Niña-seisoene te voorspel, want daar is baie onstabiliteit in die lug soos wat ervaar word met die besonder winderige toestande en reënstelsels wat baie vinnig ontwikkel.
Intussen beweeg frontale stelsels oor die winterreëngebiede in, wat die reënvalpatroon weer na die Wes- en Suid-Kaap kan verskuif. Reën word rondom 22 en 23 Desember, 27 tot 29 Desember asook in die eerste week van Januarie 2022 oor dié dele verwag, met gereelde neerslae en baie bewolkte toestande wat moontlik is.
“Op langer termyn is redelik baie reën moontlik oor die sentrale, maar veral oostelike gedeeltes van die somerreëngebied vanaf die tweede deel van Januarie wat vanaf Februarie weswaarts behoort uit te brei.”
Van den Berg sê minder reën word oor die winterreëngebied verwag vanaf die tweede deel van Januarie.
