Hoewel dele in die weste van die Oos-Kaap ’n goeie wegspring vir die somerreënseisoen gehad het, is dit steeds taamlik droog rondom Willowmore, Steytlerville, Jansenville en Aberdeen, asook die kusgedeeltes rondom Gqeberha, Alexandria en Port Alfred.
In die noordoostelike dele van die provinsie rondom Barkly-Oos, Dordrecht, Elliot en Maclear het boere tot dusver sedert die begin van die lente ver bogemiddelde reënval gemeet, wat probleme skep vir saaiboere wat lande moet voorberei, en probleme met staande water wat tot die uitbreking van insekoorgedraagde siektes en parasiete lei. Daarby is grondpaaie onbegaanbaar, terwyl verskeie brûe weggespoel het of beskadig is.
As gevolg van die El Niño Suidelike Ossillasie (ENSO) wat steeds ’n La Niña-staat handhaaf, is daar ’n groot kans dat Suid-Afrika as geheel kouer en natter toestande kan verwag, sê die weerdiens.
Hierdie voorspelde bonormale reënval behoort waterreservoirs in Suid-Afrika se somerreënstreke te bevoordeel. Hoewel die Gamtoosvallei die somerseisoen redelik droog begin het, met die Kougadam wat tans 18% vol is, meen die weerdiens dat die bonormale reënval dikwels genoeg sal voorkom om damvlakke redelik konsekwent te hou.
“Ons kan selfs damvlakke sien styg as die publiek en die kommersiële sektor aanhou om waterbesparingsmaatreëls te volg,” sê mnr. Hugh van Niekerk, ’n streeksbestuurder by die weerdiens, in die verklaring.
Die Gariepdam behoort ook bonormale reënval te ervaar wat sal verseker dat die dam goed bo 90% vol sal bly, sê Van Niekerk.
Die weerdiens waarsku egter dat die toename in reën die risiko vir vloede verhoog. “Hierdie nat toestande kan watergedraagde siektes en waterverwante beserings en ongelukke vererger. Mense word aangeraai om voorsorgmaatreëls te tref en die raad en aanbevelings van plaaslike owerhede volg.”
Die bonormale reënval behoort ’n gunstige impak op vee- en gewasproduksie hê. Boere word dus aangeraai om hul landerye vir plant voor te berei en om goeie grond- en waterbesparingsmaatreëls toe te pas. Hulle moet goeie dreineringstelsels vestig en water behoorlik opvang en opberg.
Van Niekerk sê die vooruitsig op reën sal minder gunstig wees oor die westelike dele van die Oos-Kaap teen die einde van die somer en met die oorgang na herfs.Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
