Die Suid-Afrikaanse Weerdiens het ’n oranje vlak 5-waarskuwing uitgereik vir ontwrigtende reën wat tot vloede kan lei oor die grootste gedeeltes van Limpopo en die ooste van Mpumalanga.
’n Geel vlak 2-waarskuwing is uitgereik vir ontwrigtende reën en vloede wat plek-plek kan voorkom in Gauteng, Limpopo en Mpumalanga.
Die uiters hoë brandgevaar duur voort in die noordweste van die Noord-Kaap, asook Beaufort-Wes in die Wes-Kaap.
Elders in die Noord-Kaap word mooi en warm tot baie warm weer verwag met uiters warm weer in die ooste van die provinsie.
In die Wes-Kaap sal dit gedeeltelik bewolk en warm tot baie warm, maar koel langs die Tuinroete wees waar enkele buie en donderbuie verwag kan word.
Mooi tot gedeeltelik bewolkte en warm tot baie warm weer met enkele buie en donderbuie langs die kus en aangrensende binneland word vir die Oos-Kaap voorspel.
In Gauteng word bewolkte tot gedeeltelik bewolkte en koel tot warm weer met verspreide buie en donderbuie verwag.
In Mpumalanga sal dit gedeeltelik bewolk en warm wees met verspreide buie en donderbuie. In die Laeveld word bewolkte en baie warm weer verwag met wydverspreide buie en donderbuie.
Bewolkte en warm tot baie warm weer word in Limpopo verwag met wydverspreide buie en donderbuie, behalwe in die suidweste van die provinsie waar slegs verspreide buie sal voorkom.
In Noordwes en die Vrystaat sal dit bewolk en koel tot warm wees met verspreide buie en donderbuie. Enkele buie sal in die weste van die onderskeie provinsies voorkom waar dit gedeeltelik bewolk en warm sal wees.
Bewolkte tot gedeeltelik bewolkte en warm weer word vir KwaZulu-Natal voorspel. Dit sal plek-plek in die noordooste van die provinsie baie warm wees met enkele buie en donderbuie in die suidweste.
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
