Die Suid-Afrikaanse Weerdiens sê Vrydag en Saterdag is altesame 294 mm reën binne 24 uur by die Tshivhasie-teelandgoed in die distrik Venda in Limpopo gemeet, terwyl 242 mm in die omgewing van Charter’s Creek in KwaZulu-Natal in dieselfde tydperk voorgekom het.
Tot Sondagoggend is 266 mm by Charter’s Creek gemeet, terwyl 196 mm Saterdag en Sondag by Richardsbaai gemeet is en 105 mm by Mtuzini.
Oorstromings het op talle plekke voorgekom, soos Mbombela (Nelspruit), Malelane, Krokodilbrug in die Krugerwildtuin, Newcastle, dele van Gauteng en Queenstown in die Oos-Kaap.
“Die stelsel wat die swaar reën veroorsaak het, het rondom Mosambiek begin ontwikkel en toe weswaarts geskuif oor veral Zimbabwe, waarna dit suidwaarts oor die noordoostelike en oostelike dele van die land beweeg het,” sê mnr. Johan van den Berg, onafhanklike landbouweerkundige. “Hierdie stelsel het vogtige lug byna direk vanaf die Indiese Oseaan ingevoer.”
Goeie neerslae het ook oor die oostelike dele van die Noord-Kaap, die oostelike dele van Noordwes en die grootste deel van die Vrystaat voorgekom.
Somersaaigebiede en vloedrisiko’s
Van den Berg sê beter as verwagte reënval het oor die grootste deel van die somergraangebied voorgekom. Op plekke was die neerslae uiters belangrik omdat droogtetoestande in sekere gedeeltes begin voorkom het op die belangrike pluimvorming- en saadvulstadiums van veral mielies.
“Met die nat toestande tans behoort die meeste somergrane sonder veel verdere droogterisiko oesstadium te haal. Hoewel daar plek-plek weer versuiptoestande kan voorkom, behoort dit nie ernstig te wees nie, aangesien die grond redelik baie water kan opneem. Verdere swaar reën in die volgende week of twee kan probleme veroorsaak.”
’n Ander probleem is die vloedrisiko in die Vaal-, Oranje- en Benede-Oranjerivier. “Die invloei is tans redelik sterk in die damme van die Vaal- en Oranjerivier. Die verwagting is egter dat dié riviere nie te hoë vlakke gaan bereik nie, omdat die meeste reënval in die opvanggebiede van die meer noordelike riviere voorgekom het met afvloei na die Indiese Oseaan,” sê Van den Berg.
Sterk laagdrukstelsel
Volgens Van den Berg ontwikkel daar, soos die afgelope week die geval was, weer ’n sterk laagdrukstelsel of stelsels rondom veral Zimbabwe. Dit kan tot ongeveer 20 Februarie tropiese lug invoer en swaar reën veroorsaak oor die sentrale tot noordoostelike dele van Suid-Afrika.
“Reën kan dus weer oor Noordwes, die oostelike dele van die Noord-Kaap, die hele Vrystaat, Gauteng, Limpopo, Mpumalanga, KwaZulu-Natal en selfs dele van die Oos-Kaap voorkom, veral vanaf 15 tot 18 Februarie. Plek-plek kan swaar neerslae en vloedtoestande voorkom.”
Voorspellings dui tans daarop dat teen 20 Februarie ’n tropiese versteuring kan ontwikkel wat sikloonsterkte kan bereik. Dit kan na verwagting Madagaskar uit die noordooste nader. “Dié stelsel kan baie nat toestande oor Madagaskar en omliggende gebiede veroorsaak, maar droër toestande oor Suider-Afrika in die laaste week van Februarie en selfs die eerste deel van Maart, maar dit gaan afhang van hoe sterk die ontwikkeling gaan wees asook die rigting waarin dit beweeg,” sê Van den Berg.
Winterreëngebied
Van 14 tot 18 Februarie is ligte neerslae van sowat 10 mm moontlik oor die oostelike dele van die Wynland-distrik, die Overberg en Suid-Kaap, asook die Tuinroete.
Van den Berg sê temperature kan in dié tydperk daal in dié gebiede. “In die meer westelike dele gaan dit egter steeds baie warm en droog wees. Maksimum temperature van bokant 35 °C kan voortduur tot ten minste einde Februarie in distrikte soos die Paarl, Piketberg, Worcester, De Doorns en Porterville.”Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
