Volgens die Oos-Kaapse tak van die Suid-Afrikaanse Weerdiens in Gqeberha is die El Niño Suidelike Ossiliasie (Enso) tans steeds in ’n La Niña-staat en dui voorspellings dat die stelsel sal voortduur vir die res van die huidige somer. Die Enso behoort teen die herfs na ’n neutrale vlak terug te keer.
Die voortgesette teenwoordigheid van ’n La Niña-stelsel verhoog volgens die weerkantoor die kans dat bogemiddelde reënval en laer as normale temperature oor die somerreëngebiede, wat onder meer die Oos-Kaap insluit, te wagte kan was. Minimum temperature vir die grootste deel van die provinsie sal bogemiddeld wees, met maksimum temperature wat ondergemiddeld sal wees gedurende die laatsomer en vroegherfs.
“Die teenwoordigheid van ’n La Niña-stelsel het uiteindelik sy sterkste impak op reënval in die middel van die somer.”
Volgens mnr. Brent McNamara, uitvoerende direkteur van Agri Oos-Kaap, het goeie reën tot dusver oor die grootste deel van die provinsie geval. Dit veroorsaak probleme met die landelike padnetwerk en dieregesondheid.
Die weerkantoor sê dat die hoër reënval damvlakke kan laat styg en dit sal voordelig wees vir ander waterreservoirs. Dit kan ook lei tot vloedtoestande.
Luidens die weerkantoor kan die Winterberge en omliggende gebiede normale tot bonormale reënval gedurende die oorblywende somermaande te wagte wees. Die Gamtoos- en Kougastreek het ’n droë wegspring vir die seisoen gehad, maar bonormale reënval is reg oor die streek voorspel en voldoende reën kan beteken dat die damvlakke konstant bly. Damvlakke kan selfs toeneem as die openbare en kommersiële sektor voortgaan met waterbesparingsmaatreëls.
Die Algoastelsel, wat water aan die Nelson Mandelabaai-munisipaliteit verskaf, is tans slegs 14,90% vol, met damvlakke wat weekliks daal. Die Kougadam, wat water aan die stelsel en aan besproeiingsboere verskaf, staan tans op 15,92%.
Bogemiddelde reënval word vir die opvangsgebied van die Gariepdam, wat water aan die Nooitgedachtstelsel verskaf, verwag en die damvlak sal na verwagting bo 90% bly.
Bogemiddelde reën word vir die westelike dele, wat Jansenville en Steytlerville insluit, verwag, maar die kans daarvoor neem na die einde van die somer af.Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
