Hoewel KwaZulu-Natal van vandag af kan uitsien na ’n paar droë dae en verligting van die swaar reënbuie en gevolglike vloede wat die provinsie sedert die naweek getref het, sal reënbuie waarskynlik volgens die Suid-Afrikaanse weerdiens voor en gedurende die Paasnaweek in ander gedeeltes van Suid-Afrika voorkom.
Mense wat gedurende Paasnaweek gaan reis, word dus gewaarsku om weervoorspellings en waarskuwings te monitor.
Volgens die weerdiens het die afsnylaagdrukstelsel, wat stormagtige weer oor groot gedeeltes van Suid-Afrika veroorsaak het, Sondagaand in ’n ooswaartse rigting oor KwaZulu-Natal en die Oos-Kaap begin beweeg. Die hoeveelheid reën wat geval het, het selfs Suider-Afrikaanse weerkundiges se verwagtinge oortref.
Maandagmiddag is ’n vlak 5-waarskuwing uitgereik wat later tot ’n vlak 8-waarskuwing geëskaleer is. Die weerdiens het dit intussen verder tot ’n vlak 9-waarskuwing aangepas weens die aanhoudende, swaar reënval en die impak daarvan.
Maandagaand het daar volgens die weerdiens oornag veral baie reën geval. Sommige weerstasies het meer as 300 mm binne 24 uur aangeteken. Swaar reënval is veral by die internasionale lughawe King Shaka (225 mm), Margate (311 mm), Mount Edgecombe (307 mm), Port Edward (188 mm) en Virginia-lughawe (304 mm) aangeteken.
“Sulke reënval kom gewoonlik voor met tropiese siklone, maar die weerdiens moet dit sterk beklemtoon dat die huidige weerstelsel nie tropies van aard of ’n tropiese sikloon is nie,” lui ’n verklaring deur die weerdiens.
Volgens die weerdiens het aardverwarming en klimaatsverandering nie die reënstelsel veroorsaak nie. “Ons kan nie individuele weergebeurtenisse op kort termyn aan gebeurtenisse op langer termyn toeskryf nie. Daar kan egter gesê word dat ernstige en ekstreme weersomstandighede, soos hittegolwe en swaar reën, meer gereeld en op ’n groter skaal voorkom as in die onlangse verlede.
“Met ander woorde, swaar reën soos wat tans ervaar word, kan weer in die toekoms verwag word en sal meer gereeld voorkom.”
* Intussen het die Suid-Afrikaanse weerdiens vandag (13 April 2022) volgens 'n latere verklaring aangedui dat reënbuie en donderstorms Vrydag oor die grootste gedeelte van die sentrale binneland verwag kan word. As gevolg daarvan is gelokaliseerde vloede asook hael en sterk winde, wat skade kan veroorsaak, in Noordwes, die Vrystaat, Oos-Kaap en KwaZulu-Natal moontlik.
Saterdag sal wydverspreide reënbuie en donderderstorms oor die sentrale provinsies voortduur en versprei na die oostelike en noordoostelike provinsies met swaar buie wat oor die Noordwes, Vrystaat en Gauteng kan uitsak.
