Meer as 25 mm reën is op verskeie plekke gemeet. Dit het ook gehael op enkele plekke.
Mnr. Johan Smal van die plaas Rosendal op die grondpad tussen Merweville en Beaufort-Wes, sê hulle het Vrydag 6-8 mm donderweerreën gekry.
“Die reën was maar kol-kol. Saterdagmiddag het die donderweer weer opgesteek. Ons was besig om by Twee Rivieren, 20 km van Rosendal, te skeer. Die weer het baie gedreun. Dit was eers sulke groot druppels wat ver uitmekaar geval het. Ná ’n sterk rukwind, het dit begin reën en hael.”
Hy sê die haelkorrels – enigiets van duifeier- tot gholfbalgrootte – het wit gelê. “Die veld gaan nou baie lekker groei.”
Op pad terug na sy woonplaas het dit “gestortreën, amper ’n wolkbreuk, maar dit het nie groot skade aangerig nie”.
‘Sagte intrekreën’
Volgens Smal het dié harde donderweerreën Saterdagmiddag verander in reën wat hom aan winterreën herinner. “Ons het 30 mm van daardie sagte intrekreën gekry. Vir die Karoo gaan dít ongelooflik baie beteken omdat alles wegsak.”
Hy het ’n maand gelede ook reën gekry en die veld is mooi. Tog is daar nog dele wat baie droog is.
Ongelukkig bly die plae nie weg nie. Smal sê ’n swerm sprinkane het Saterdag oor sy plaas getrek. “Die swerms is nie so groot soos vroeër vanjaar nie, maar hulle het reeds oorgegaan van voetgangers na vlieërs.”
As gevolg van die probleem met muggies, veral by riviere, moes hy ook sy skape teen bloutong ent.
Eerste ordentlike reën
Die 35 mm sagte reën wat mnr. Frans Hattingh van Sandstraat, Merweville, gekry het, was die eerste ordentlike reën wat hy dié seisoen gekry het.
Hy sê dit sal so agt dae duur voordat die eerste groen kos vir die skape beskikbaar is, maar dis belangrik dat hulle gou weer reën kry. “Die opvolg is mos maar die ding. As ons oor 14 dae weer sulke reën kan kry, is ons goed op pad. Nou moet dit nog net lammers kom reën.”
Ook mnr. Toli Victor van Die Meul, Merweville, het 27 mm sagte reën teen Sondagoggend gemeet.
Hy sê hulle trek eintlik “half taaierig, maar nie so erg soos die vorige sewe jaar nie”.
Hul vorige ordentlike reën was in die tweede week van Februarie. Daarna het dit min gereën en nooit genoeg om goeie weiding te maak nie. Daardie reën het die steekgras so laat groei dat die veld goed gelyk het. Hul skape was egter nie in ’n goeie kondisie nie.
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
