Tropiese storms volg geen vaste patroon nie, veral nie as dit oor land begin beweeg en dan begin verswak nie. Die voorspelbaarheid van die beweging van dié storms is dus baie moeilik.
“Dit kan disintegreer en in verskillende rigtings beweeg en steeds swaar reën veroorsaak. Die huidige oorblyfsels van die sikloon Freddy volg dieselfde chaotiese en onvoorspelbare patroon,” sê mnr. Johan van den Berg, onafhanklike landbouweerkundige.
Freddy het weswaarts beweeg van waar dit wes van Indonesië begin ontwikkel het. Dit het oor Madagaskar en Mosambiek beweeg, waar dit verswak het. Die kern van die tropiese aktiwiteit was teen einde Februarie oor die sentrale tot suidelike dele van Mosambiek. Windsnelhede het geleidelik verswak van meer as 220 km/h toe dit oor die Indiese Oseaan beweeg het tot ongeveer 45 km/h oor Mosambiek.
Reën vir SA
“Huidige voorspellings stem steeds nog nie saam nie, maar dit lyk asof die aktiwiteit besig is om ’n draaipunt te bereik in die oostelike dele van Zimbabwe. Dit kan dan ooswaarts terug in die Mosambiekkanaal beweeg. Voorspellings toon dat dit verder ooswaarts weer tot oor Madagaskar gaan beweeg en dalk ook weer na die Mosambiekkanaal kan terugkeer en die westelike kuslyn van Madagaskar op meer as een plek kan tref voordat dit teen die einde van dié week ooswaarts gaan beweeg in die Indiese Oseaan in.”
Die implikasie van hierdie beweging is dat dit die toestande vir reën oor die sentrale tot westelike dele van Suid-Afrika ietwat kan verbeter met tropiese vog wat weswaarts oor Namibië kan afbeweeg. “Hierdie opstelling kan ook deels verantwoordelik wees daarvoor dat koue fronte redelik ver noord kan begin deurbeweeg. Daar is dus dan ook ’n voorspelling dat ’n koue front van 4 tot 6 Maart vanuit die suidwestelike dele die land kan beïnvloed en ligte reën veroorsaak oor die Wes-Kaap en temperatuurdalings oor die suidelike dele van die land tot gevolg kan hê.”
’n Volgende frontale stelsel kan weer oor die land voorkom van 8 tot 10 Maart en verdere ligte reën oor die winterreëngebied veroorsaak.
Nóg ’n tropiese storm?
Baie warm toestande gaan die week oor die Noord-Kaap voortduur, maar dit lyk asof dit effens koeler gaan wees as wat verlede week voorspel is. Toestande vir reën oor veral die sentrale dele het verbeter met neerslae van 20 mm tot 40 mm wat tydens enkele buie moontlik is oor die oostelike dele van Noordwes, die noordelike dele van die Vrystaat, die suidelike dele van Mpumalanga, die hele KwaZulu-Natal en die noordelike dele van die Oos-Kaap van Dinsdag 28 Februarie tot ongeveer 8 Maart.
“Dit lyk asof min reën gaan voorkom in die laaste deel van Maart en die eerste deel van April oor die grootste deel van die somerreëngebied. Daar is egter ’n kans dat daar steeds reën kan voorkom in die tweede deel van April en die eerste deel van Mei.”
Van den Berg sê die baie droë suidelike dele van die Oos-Kaap, wat die gebiede rondom Gqberha insluit, se kans op noemenswaardige reënval is klein tot middel April, waarna dit verbeter vir die laaste deel van April en die eerste deel van Mei.
“Reënvaltoestande vir veral Maart kan nog beïnvloed word deur tropiese storms en siklone. Tans is daar nog ’n tropiese storm, Enala, wat oor die sentrale Indiese Oseaan beweeg, maar dit behoort ver oos en suidoos van Madagaskar verby te beweeg.”
Winterreën
Van den Berg sê hoewel frontale stelsels reeds oor die Suidwes-Kaap begin inbeweeg, lyk die toestande vir reën vir die April tot Junie gemiddeld.
“Dit is egter die tweede deel van die winter, vanaf Julie tot September, waar die kans baie goed is dat ondergemiddelde reënval kan voorkom. Dit is ook dié tydperk waartydens die meeste aanvulling aan damvlakke gewoonlik voorkom.”Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
