Volgens die Suid-Afrikaanse Weerdiens word Cheneso tans as ’n matige tropiese storm geklassifiseer. Dit beweeg tans teen ’n baie stadige spoed van 6 km/h in ’n noordwestelike rigting.
Die weerdiens dui aan dat volgens weermodelle van RSMC La Réunion Cheneso moontlik in die komende dae sal versterk weens gunstige omstandighede, soos onder meer baie warm tot uiters warm seeoppervlakstemperature van 29 °C.
Dit is volgens die weerdiens moontlik dat Cheneso teen Saterdag 28 Januarie tot ’n sikloon kan versterk.
Die weerdiens lig dit egter baie duidelik uit dat selfs indien die voorspellings realiseer, dit na verwagting nie ’n direkte impak op Suid-Afrika sal hê nie. Soos met enige tropiese storm is daar baie onsekerheid betrokke oor die stelsel se beweging in die toekoms.
Volgens die weerdiens stem weerkundiges saam dat Cheneso sal aanhou versterk met gemiddelde winde van 93 km/h wat vandag in die omgewing van die stelsel se oog kan ontwikkel.
Daar word verder verwag dat die stelsel in ’n meer suidwestelike rigting sal begin beweeg wat die stelsel op Saterdag 28 Januarie naby aan die Europa-eiland in die suidelike gedeelte van die Mozambiekkanaal kan neem.
Teen dan sal die stelsel volgens die weerdiens op sy sterkste wees met ’n windsterkte van gemiddeld 148 km/h en rukwind van 185 km/h. Die stelsel sal daarna effens verswak en in ’n meer suidelike rigting begin beweeg
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
