Die Suid-Afrikaanse Weerdiens het ’n geel vlak 2-waarskuwing uitgereik vir hewige donderstorms, swaar reënbuie en sterk wind wat tot die verspoeling van sommige paaie en laaggeleë gebiede kan lei op die Hoëveld en die platorand van Mpumalanga, die suide van Limpopo en die KwaZulu-Natalse Middelland.
Nog ’n waarskuwing is uitgereik vir ’n uiters hoë brandgevaar in die Kai !Garib-munisipaliteit in die Noord-Kaap. Verder word gedeeltelik bewolkte en warm tot baie warm weer met los buie en donderbuie vir die noorde en ooste van die provinsie voorspel.
Bewolkte en koel tot warm weer met verspreide buie en donderbuie word vir Gauteng, Mpumalanga, Limpopo, Noordwes, KwaZulu-Natal en die Vrystaat voorspel.
Mooi weer word vir die Wes-Kaap voorspel. Dit sal warm tot baie warm wees, maar plek-plek uiters warm in die provinsie se binneland. In die noordooste sal dit teen vanmiddag gedeeltelik bewolk wees met los donderbuie.
In die Oos-Kaap sal dit gedeeltelik bewolk en koel tot warm wees met los buie en donderbuie.
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
