Ligte sneeu en baie koue toestande kan Saterdag en Sondag oor die distrik Ceres voorkom, met maksimum temperature van 8 °C en minimum temperature van tot -5 °C wat in die omgewing moontlik is. “Redelike swaar ryp is moontlik oor groot dele van veral die Hexriviervallei, die Bokkeveld, die Breederiviervallei en dele van die Rûens soos Caledon,” sê mnr. Johan van den Berg, onafhanklike landbouweerkundige.
Baie koue toestande word ook oor die suidoostelike en oostelike dele van die binneland verwag, veral die Suidoos-Vrystaat op plekke soos Ficksburg, Bethlehem, Reitz en Harrismith waar baie lae minimum temperature van Saterdag tot Dinsdag (3 tot 5 Julie) kan voorkom as gevolg van ’n koue front. Sneeu is moontlik is op die Drakensberge en ook die noordelike dele van die Oos-Kaap soos Barkly-Oos en Elliot.
Minimum temperature van naby aan -10 °C is moontlik by veral Barkly-Oos, Ficksburg en Harrismith vanaf Sondag tot Dinsdag. “Baie koue toestande is ook moontlik oor die Hoëveld van Mpumalanga waar temperature tot -5 °C of laer kan daal vanaf Sondag, met -3 °C wat by Standerton en -4 °C wat by Amersfoort moontlik is. Minimum temperature kan oor dele van KwaZulu-Natal soos Kokstad en Winterton tot -6 °C daal,” aldus Van den Berg.
“Dit lyk asof die eerste week van Julie die koudste week van die jaar tot dusver kan wees in hierdie gebiede, veral wat betref minimum temperature.”
Reën
Reën van tot sowat 20 mm word die naweek oor die Kaapse metropool en die suidelike dele van die Wynland-distrik voorspel. Ligter neerslae van tot 10 mm word die naweek en van 8 tot 10 Julie oor die res van die winterreëngebied voorspel. Reën van minder as 5 mm kan tot so ver noordwes as Clanwilliam voorkom, en tot by Riversdal in die Suid-Kaap.
Die kans op reën die res van Julie lyk ongunstig. Frontale stelsels sal na verwagting die Wes-Kaap rakelings tref, maar eerder suid van die land verbybeweeg. “Toestande lyk beter teen einde Julie en in Augustus wanneer frontale stelsels waarskynlik weer verder noord gaan voorkom. Die kans is goed dat frontale stelsels die land tot baie laat in Oktober kan beïnvloed.”
Wat die moontlikheid van verdere neerslae oor die somerreënstreek betref, sê Van den Berg ná die neerslae van tot 30 mm wat rondom 22 Junie oor veral die sentrale en westelike dele van die binneland voorgekom het, word min verdere reën in die winter en lente oor dié streek verwag word.
“Onderliggend het die langtermynvoorspellings vir reën begin verswak, want La Niña se gunstige effek op somerreën is slegs vanaf November tot Junie. Daar is wel ’n kans dat die Ooskus en die aangrensende binneland van die Oos-Kaap en KwaZulu-Natal wel reën gedurende die winter kan kry.”
Skeertyd
Kleinveeboere moet vir die naweek en volgende week voorbereidings tref om toe te sien hul diere het genoegsame beskutting teen die koue weer. Wat skeertyd betref, sê Van den Berg hoewel die tydperke rondom 2 tot 5 Julie en middel Julie baie koue toestande kan bring, lyk die res van Julie gunstig om te skeer. Sneeu en ligte reën kan die komende naweek en rondom middel Julie risiko’s inhou vir die skeer van kleinvee in die Oos-Kaap.
Die grootste konsentrasie van die land se wolskape kom in die binneland van die Oos-Kaap, die suidelike dele van die Vrystaat, die Hoëveld van Mpumalanga en die Overberg in die Suid-Kaap voorkom, met Angorabokke wat meestal in die Oos-Kaap voorkom.
“Toestande vir skeer lyk tans gunstiger in die tweede deel van Julie as in Augustus wanneer daar ’n moontlikheid is van baie koue toestande en reën,” aldus Van den Berg.
