Die La Niña-stelsel is besig om te verswak. Hoewel dit stadiger gebeur as wat aanvanklike voorspellings in November aangedui het, dra dit onderliggend by tot swakker reënvaltoestande.
“La Niña-neigings is steeds global sigbaar, soos die swaar sneeu en baie koue toestande oor veral die noordwestelike dele van Amerika en aangrensende dele van Kanada met droë toestande oor die suidelike en noordwestelike dele van Argentinië,” sê mnr. Johan van den Berg, onafhanklike landbouweerkundige. “Aan die ander kant het die baie nat toestande in die suidooste van Australië reeds oorgegaan in ondergemiddelde reënvaltoestande vanaf middel November, maar veral in Desember en die eerste deel van Januarie, wat ’n aanduiding is dat die La Niña-stelsel se effek afneem.”
In Suid-Afrika is dit nie ongewoon dat droër toestande in die tweede deel van die somerseisoen voorkom nie, al is daar steeds ’n La Niña-stelsel teenwoordig. Die bykomende versteuring in reënvalpatrone as gevolg van tropiese storms in die westelike Indiese Oseaan, kan verder aanleiding gee tot droër toestande in veral Februarie en Maart.
