Plate water staan in landerye in die distrik Mareetsane in Noordwes nadat tot 110 mm reën Saterdag daar geval het. Dit het gevolg op reeds swaar neerslae en boere probeer tans om skade-opnames te doen, maar kan nog nie in hul landerye inkom nie. Talle plaaspaaie in die omgewing was vir dae onbegaanbaar.
Luidens ’n opname deur Agri Noordwes het van die plase in dié distrik voor die naweek se swaar neerslae reeds skade aan 1 600 ha se somergrane aangemeld. Sowat 600 ha van dié lande kon oorgeplant word, maar die naweek se reën het weer van die landerye beskadig.
Mnr. Naudé Pienaar, assistent-hoofbestuurder van die organisasie, sê hulle vergader môre met die provinsiale rampbestuurowerheid om die moontlikheid vir ’n aansoek om ramphulp te bespreek. “Dis nou die hoëpotensiaallande wat begin verspoel en daar is somergrane wat nie kan of gaan herstel ná water- en versuipskade vroeër nie.”
Die skade aan somergewasse wat reg oor die provinsie aangemeld is, wissel van geen skade tot 40% skade.
Die neerslae wat die afgelope ses weke oor dele van die provinsie aangeteken is, is in baie gevalle tot dubbel soveel as die normale gewone reënval vir dié periode. In die distrik Ottosdal is die gemiddelde reënval vir die tydperk sowat 200 mm en hulle staan reeds op 404 mm. In die distrikte Rysmier en Opraap is die gemiddelde reënval vir die tydperk 200 mm en 150 mm onderskeidelik. Albei distrikte het sedert begin Desember sowat 400 mm gemeet.
In die distrik Lichtenburg is 210 mm sedert begin Desember gemeet teenoor die langtermyngemiddelde van 110 mm vir dié tydperk. Die gemiddelde neerslae vir die distrik Bloemhof vir dié tydperk is 78 mm en daar is 248 mm oor die afgelope ses weke aangemeld. Potchefstroom het ook dubbel soveel reën as gewoonlik gehad. Die langtermyngemiddelde vir dié tydperk is 140 mm, terwyl 280 mm die afgelope ses weke gemeet is.
