Weertoestande is die belangrikste faktor wat die landbousektor se sukses en bydrae tot die ekonomie bepaal. Die somerseisoen het gunstig begin met goeie, vroeë seisoenale reën reg oor Suid-Afrika en voorspellings dat ’n La Niña-fase voorkom, sê mnr. Paul Makube, senior ekonoom van FNB Agribesigheid.
Gunstige weervoorspellings en sterk kommoditeitspryse het boere oortuig om meer somergraan- en oliesaadgewasse in die 2021-’22 seisoen aan te plant. Die verwagte oppervlakte onder somergraan is tans ongeveer 3,12 miljoen ha, ’n toename van 7% teenoor die 2020-’21-seisoen.
Volgens Makube kan die Suid-Afrikaanse landbousektor ’n rekordoes – ongeveer 17 miljoen ton mielies en 2,22 miljoen ton sojabone – insamel as die gunstige toestande voortduur.
Na verwagting sal alle landboukommoditeite gedurende die 2021-’22-produksieseisoen beter as normaalweg presteer. Dit volg op ’n uiters suksesvolle 2020-’21-seisoen vir plaaslike uitvoerbedrywe.
In die derde kwartaal van 2021 het die vraag na uitvoerprodukte, onder meer mielies, sitrus, wyn, suiker, neute en ander vrugte, met ’n bykomende 8% gestyg ten spyte van ’n moeilike handelstydperk gedurende die Julie-onluste en die voortdurende covid-19-pandemie, sê Makube. Mielie-uitvoer het met 32% toegeneem vergeleke met die vorige kwartaal.
Tog het Statistieke Suid-Afrika ’n onaangename verrassing vir die landbousektor gehad met die aankondiging dat die landbousektor se uitsette met 13,6% gekrimp het en sy bydrae tot die bruto binnelande produksie met ’n 0,4-persentasiepunt gedaal het. Landbou-ekonome meen dit is nie iets om oor bekommerd te wees nie.
Volgens Makube sal die landbousektor in die laaste kwartaal van die jaar terugbons en ’n verwagte groeikoers van 7% vir die jaar behaal danksy hoër kommoditeitspryse en die vooruitsig van nog ’n uitstekende landbouseisoen. Hoër kommoditeitspryse sal boere egter ook onder druk plaas weens die stygende koste van brandstof en voer.
