Die weerdiens waarsku al sedert
Maandag 28 November oor baie warm weerstoestande in die Wes-Kaap met
temperature van 40 °C in die westelike gedeeltes van die provinsie, veral
Matsikama en Bergrivier. ’n Brandwaarskuwing is vir Kamiesberg, Bergrivier en
die Swartland uitgereik.
Die hittegolf het Dinsdag 29 November oor die sentrale binneland en die Suidkus langs beweeg. Prins Albert, Oudtshoorn en Kannaland het baie warm toestande ervaar met uiters ongemaklike omstandighede in die Sentraal- en Klein-Karoo.
’n Brandwaarskuwing is vir die sentrale binneland van die Noord-Kaap, die Sentraal- en Klein-Karoo en die Breedevallei uitgereik.
Uiters warm omstandighede het vandag voorgekom in Prins Albert en Beaufort-Wes, asook die munisipale distrik Sarah Baartman in die Oos-Kaap en die noordwestelike binneland van die Noord-Kaap.
Daar is ook gewaarsku teen brande in die Hantam- en Karoo-Hooglandstreek in die Noord-Kaap, Witzenberg- en Breedevallei-streek in die Wes-Kaap en die Sarah Baartman- en Raymond Mhlaba-streek in die Oos-Kaap.
Hoë temperature sal volgens die weerdiens môre in Prins Albert en Beaufort-Wes voortduur. “Wanneer temperature uiters hoog is, is mense se vermoë om af te koel deur te sweet beperk. Dit kan tot hipertermie lei. In uiters warm omstandighede is sonsteek die ernstigste gesondheids- en veiligheidsgevaar. Dit kan noodlottig wees as mediese behandeling nie betyds toegedien word nie.”
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
