Die sikloon Freddy het ná ongeveer 39 dae verswak en weerpatrone begin stadig na normaal terugkeer.
Sterk laagdrukstelsels kom egter oor Angola, Zambië en die noordelike dele van Mosambiek voor. Dié stelsels veroorsaak swaar neerslae oor dié gebiede, maar het minder reën oor die suidelike dele van Afrika tot gevolg.
“Die Indiese Oseaan-hoogdrukstelsel domineer oor die noordoostelike dele en dit veroorsaak dat tropiese vog op die perimeter suidooswaarts beweeg oor Namibië en die westelike en sentrale dele van Botswana in die volgende week tot tien dae tot net voor einde Maart. Meer as 20 mm reën kan oor daardie gebiede uitsak,” sê mnr. Johan van den Berg, onafhanklike landbouweerkundige.
Ligte neerslae van 20 mm of minder kan gedurende hierdie tydperk oor die sentrale dele van Suid-Afrika voorkom met meer reën oor die suidoostelike dele, dit wil sê veral oor die Oos-Kaap en suidelike dele van KwaZulu-Natal. “Baie min of geen reën word oor die westelike dele van Suid-Afrika voorspel, wat hoofsaaklik die westelike dele van die Noord-Kaap insluit.”
Laagdrukstelsel
Die sterk laagdrukstelsel wat van vandag af oor die Wes-Kaap begin inbeweeg, kan veral Woensdag en Donderdag swaar reën oor veral die Suid-Kaap en die aangrensende binneland veroorsaak.
“Meer as 20 mm of selfs swaarder neerslae word verwag op plekke soos Grabouw, Caledon, Swellendam, Worcester, Laingsburg en ander distrikte oor die sentrale tot suidoostelike dele van die Wes-Kaap. Daar is ’n gevaar vir oorstromings in daardie gebiede,” sê Van den Berg. “Omdat die geografiese beweging van die afsnylaagdrukstelsel moeilik voorspelbaar is, is daar ook ’n gevaar vir swaar reën in aangrensende gebiede.”
Ligter neerslae kan oor die Tuinroete en verder langs die Oos-Kaapse kus verwag word, met meer reën oor die noordoostelike dele van die Oos-Kaap.
Volgens Van den Berg kan temperature, en veral minimum temperature. redelik koel bly in die sentrale, maar veral suidoostelike dele van die land in die laaste week tot 10 dae van Maart. “Dit lyk egter tans asof koue lug nie so ver noord gaan inbeweeg soos aanvanklik verwag is nie.”
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
