Die Suid-Afrikaanse Weerdiens het ’n oranje vlak 5-waarskuwing uitgereik vir ontwrigtende reën wat tot vloede kan lei in KwaZulu-Natal, die oostelike gedeeltes van die Oos-Kaap, die ooste en noorde van Limpopo, asook die Laeveld en platorand in Mpumalanga.
’n Geel vlak 2-waarskuwing is uitgereik vir ontwrigtende reën wat plek-plek tot vloede kan lei in die oostelike en sentrale gedeeltes van die Vrystaat, asook die ooste van Noordwes.
Nog ’n geel vlak 2-waarskuwing is uitgereik vir erge donderstorms met sterk wind, swaar neerslae en weerlig in Gauteng, die suidweste van Limpopo en die Hoëveld in Mpumalanga.
Volgens die weerdiens sal dit vandag bewolk en koel tot warm wees met verspreide buie en donderbuie in Gauteng, Mpumalanga, Limpopo en KwaZulu-Natal.
Bewolkte en warm weer met enkele buie en donderbuie word vir die Vrystaat en Noordwes voorspel. In die oostelike gedeeltes van dié provinsies sal buie en donderbuie wydverspreid voorkom.
Die weerdiens voorspel mooi en warm tot baie warm weer vir die Noord-Kaap. In die ooste van die provinsie sal dit gedeeltelik bewolk wees met enkele buie en donderbuie.
In die Wes-Kaap word mooi en warm tot baie warm weer verwag met uiters warm toestande in die weste van die provinsie.
Bewolkte en koel weer met enkele tot verspreide buie en donderbuie word vir die Oos-Kaap voorspel. Donderstorms kan plek-plek voorkom.
Die Suid-Afrikaanse Weerdiens het Maandag gewaarsku dat ’n afsnylaagdrukstelsel tot Saterdag wydverspreide buie en moontlik vloede in die sentrale en oostelike gedeeltes van Suid-Afrika kan veroorsaak.
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
